العـقـــــل
ظليمة عليه العقل **** وجرحه جديد مازال خاطري
سبايب امراض العقل **** تبع العين والعين ضالة
عقلي تأكل فيه العازة *** متبري من نارأعزازه
العقل مو كبير أسنين *** مغير يأس لولاف شيبه
للعقال نقيم مقام *** وللي سفيه مانديرله عناء
عزاء العقل فيك ادموع *** عليك وين ما رايف بكاء
من خونه لولاف او جاي***نخلط في نومى با ابكاي
مضروب بسيف الشقاء *** العقل لين هدا حالته
الــــــعين
مالك في الغريب نصيب*** على هلك يالعين عاودي
سبحان خالقك ياعين *** خلق معاك دمع يونسك
ننهى العين عن دكراه ** تقول نبيه لين تنظره
ننهاك عن الغني يالعين *** نلقاك فى سريبه تايها
ما اتقولوش العين حنونه *** خاينها ودافع دونه
العين هدبها مبروم *** على عزيز يامة بكت
عندى عين اشكا ما تشكي *** لكن وين اترايف تبكي
غلاهم بقى للعين *** خيال ياعلم في نومها
الـــــخاطر
الخاطر مرابيعه صاف *** ان غابوا ايلاقي غيرهم
صابروالكواين فيه *** شديد عزم تاريته خاطري
الخاطر من قلة دبار *** ايكبر في نارعلى نار
الخاطر جرحه ما داوه *** على كل اسبيتار رموه
الخاطر في اغياب غواليه ** انصبر فيه ** اتقول رضيع انزازي بيه
الخاطر طول الليل ايجض ****وهلنا يحسابوه مرض
الــــيأس
ياس عزيز امعاي داوم *** هوتاوم والتوم يتاوم
اليأس مالقاء ماايدير *** لقاء امعاي لولاف شالهم
قاضي الياس غلانا ضره *** حكم اعدام من اولمره
اليأس وين جاء بيموت *** لم اعياله وصاهم علي
ذيب اليأس عليا هازي *** في شلاق الصوب ايوازي
الله يخرب بيتك يايأس *** اتباعد في ناس على ناس
شينك يأس عليا امرسي *** قبل ايموت ضناه اموصي
الـــمرهون
حي علي كلت ما عندي *** نارك يامرهون افندي
خلاني المرهون الجافي** نوطا في النار ونا حافي
يا مرهون ايش انديرولك *** تربط وتخالف فى قولك
ع المرهون بكا من جده ***عقلى نين افراشه نده
رضينا يا مرهون عليك *** رضا ما نلته من والديك
يا مرهون خدوني منك . . ساكت ماتتكلم كنك
نار المرهون المدسوسة*** تسطر كيف سطير السوسة
الخاطر من نار المرهون*** ايفز تقول عليه اجنون
دعيت عليهم مرهونيين *** ونكره فلي ايقول امين
الـــــصبر
هاك الصبر داوي داك*** احسن عزاك في صاحب غلاء
عالصبر ما يلتام *** جرحه جديد مازال خاطري
صباره عيني ما اسمحها *** حتى كان عزيز جرحها
عليك وينراد الله *** انسي عزيز يالعين واصبري
الصبر شين وزين *** عليه كان يالعين تقدري
الصبر يالعين طيب *** حطيه في معاديل الغلاء
الــــجرح
مجروحين الجرح انحسوا *** غير اقبال الناس اندسوا
ثلاتين ماهن جرح *** ظليل خاطري جاءبينهم
الجرح كان طال العظم *** يبقى لين يموت صاحبه
وين انقول خلاص ارتحنا *** يخطر زول اللى جارحنا
خايف العقل ايجول *** يلقى الجرح وايغيب الدواء
الــــعزيز
عزيز في المنام ايجي *** وفي الارض جوبةياعلم
عزيز اغتني بالغير *** ابكوا امعاي ماليلة هناء
عزيز هو ربيع العين *** رفيق عمر ما ينتسا
عزيز كان فيه نصيب *** نرجوه رجا طول عمرنا
القديم
يأسك يا القديم رفيقي** كل نهار مشيط ريقي
يالقديم عليك مرايف ** لكن من حسادك خايف
يالقديم معيا كنك** جيت بعد قولت نسينك
يالقديم خطاك معاي ** قهرني دويته ببكاي
يالقديم ابرم داويهن** راك مطاويح مخليهن
يا القديم جظيظي منك*** نين عويلي قالوا كنك
اهداء من سنار الجراري الى جميع اعضاء المنتدى
الأحد يونيو 13, 2010 4:29 pm
