موضوع: حمد ، حمد ، حمد الأحد يوليو 11, 2010 11:28 am
الله ينعل الشيطان..فيه هذاك الراجل عنده ثلات أولاد..مسميهم (حمد)..كل واحد منهم اسمه ( حمد) ..مرض الراجل ..طال مرضه..وينما أشرفع الموت كلمهم وقال لهم اسمعو وصيتي لكم ..حمد يارث ..وحمد يارث....وحمد ما يارث)..وقضى ومات
كل واحد قال نا نارث..واللي ما يارث هو أنت).. اختلفوا..وقالو نمشو للقاضي..وهم ما شين لقيوا جرة ناقة ..واحد قال :ها الناقة عورا... واحد قال:ها الناقة عورا واحد قال: ها الناقة بترا
وصلو لنجع القاضي ..لقيو عنده عزومة ..دابح حولي..القاضي راجل كريم ..بيته ديمه عامر بالخطاطير في راجل ينشد على ناقة..قال لهم :صادفتكم شي ناقة).. قال له حمد الكبير: ناقتك عورا مع اليمين..طار الراجل وقال: أيوه هى ناقتي.. وقال حمد الوسطي : ناقتك عرجاء مع اليسار..قال الراجل أيوه هى ناقتي.. وقال حمد الصغير: ناقتك بترا..قال الراجل أيوه هى ناقتي.. وين لقيتوها قالوا : ما رينا لا ناقة ولا جمل قال الراجل : لا..ناقتي عندكم..حلفو بت ما نطروها.. قال القاضي لصاحب الناقة:صحيح ناقتك عورا وعرجا وبترا؟ قال الراجل : صحيح
التفت القاضي وقال : كيف عرفتوا أوصاف الناقة من غير ما تنطروها؟! قال حمد الكبير: الناقة تاكل في العشب مع القرب الايسر..وعرفت انها عورة من اليمين... وقال حمد الوسطي : الناقة توطا بثقلها ع الكراع اليمين .. عرفت انها عرجا مع اليسار.. قال حمد الصغير: بعر الناقة كوم واحد لو كان فيها ذيل طرطش البعر.. تعجب القاضي والناس من فطانة الضنا..
فضت هذيك العزومة وكل واحد مشي في حاله.. قالوا الضنا:ياسيدي القاضينحنا تاعبين لك من غادي..عندنا مشكلة نريدوك تحلها لنا.. قال القاضي: الليلة ما فيه الا الصلاة على النبي وبكرة الصباح رباح..
لمباكر في الضحاه .. قال حمد الكبير للقاضي : اللي طابخة الطعام البارح عليها الدورة.. وقال حمد الوسطي : الشاه اللي كليناها البارح فيها سر كلب.. وقال حمد الصغير: ما تواخدني يا سيدي القاضي أنت فيك سر يهودي .. قال القاضي : امهلوني للعشية..
مشي نشد الولية اللي طبخت الطعام قالت : صحيح على الدورة.. نشد راعي الغنم قال : صحيح الحولي ماتت امه جاع تالاه كلبه رضع منها.. نشد امه قالت: وانت صغير رضعاتك جارتي اليهودية مرة والا مرتين...
في العشية قال القاضي : الكلام اللي قلتوه كله طلع صحيح لكن كيف عرفتوا؟..
قال حمد الكبير: الطعام مالح الولية اللي عليها الدورة ما تستطعمش الملح كل ما تذوق تلقاه باسل تزيد الملح.. قال حمد الوسطي : شحم الشاه المفروض يكون بينه وبين العظم هبر والشحم البارح فوق العظم كي شحم الكلاب... التفت القاضي لحمد الصغير وقال له:باهي انت كيف عرفت انه في سر يهودي؟ قال: عزومتك البارح سمحة ما خصصت لا خير لكن فراشنا عطيب صقعنا واليهود وكالهم سمح وفراشهم بالهون والنصارى وكالهم بالهون وفراشهم سمح والناس يقولوا: كل مع اليهود وارقد مع النصارى..
بعد الغدا قال القاضي : ايش مشكلتكم؟ قالوا اسمنا واحد .. اسمنا حمد .. وبونا _الله يرحمه_وهو على فراش الموت قال : حمد يارت .. وحمد يارت..وحمد ما يارت..اختلفنا ..ما عرفنا من اللي ما يارت.. قال القاضي : ساهلة .. عدو تريحو في هذاك البيت ..واللي نذز عليه يجيني وحده..
دز القاضي على حمد الكبير ..جاه .. قال له : بوكم قليل الرحمة .. ما يريد لكم الخير .. مات وسيب لكم مشكلة.. لكن ان كان تريد تارت عدي جيب لي قطعة من كفن ابوك .. قال الولد : والله ما نقدر يا سيدي القاضي نحل قبر بوي وندس حرمته..
دز القاضي على حمد الوسطي ..جاه .. قال له : بوكم قليل الرحمة .. ما يريد لكم الخير .. مات وسيب لكم مشكلة.. لكن ان كان تريد تارت عدي جيب لي قطعة من كفن ابوك .. قال الولد : والله ما نقدر يا سيدي القاضي نحل قبر بوي وندس حرمته..
دز القاضي على حمد الصغير ..جاه .. قال له : بوكم قليل الرحمة .. ما يريد لكم الخير .. مات وسيب لكم مشكلة.. لكن ان كان تريد تارت عدي جيب لي قطعة من كفن ابوك .. قال : القطعة تريدها صغيرة والا كبيرة ؟ والا نجيب الكفن كله..!
قال القاضي: هذا حمد هو اللي ما يارت .. غضيب شامس .. غضيب رب وعرب.. بوكم كان راجلب عاقل .. الله يرحمه ويخفف عنه التراب الثقيل..
ونا جيت جاي .. وهم عدوا غادي مرحبه بك انت خير منهم
نقلت القصة من كتاب خراريف ليبية للكاتب يوسف عقيلة
بسمة أمل مدير
عدد المساهمات : 2663
موضوع: رد: حمد ، حمد ، حمد الأحد يوليو 11, 2010 5:03 pm
حكمة وعبرة فيها
بارك الله فيك
العمدة
عدد المساهمات : 1099
موضوع: رد: حمد ، حمد ، حمد الإثنين يوليو 12, 2010 8:31 am
سندريلا كتب:
حكمة وعبرة فيها
بارك الله فيك
مشكورة ع المرور تقبلي تحياتي
???? زائر
موضوع: رد: حمد ، حمد ، حمد الثلاثاء يوليو 13, 2010 2:58 pm
رائع العمدة قصة لها معنامشكور بارك الله فيك
العمدة
عدد المساهمات : 1099
موضوع: رد: حمد ، حمد ، حمد الثلاثاء يوليو 13, 2010 5:11 pm
الأحد يوليو 11, 2010 11:28 am
